Məzmuna keç

Rauf Babayev

Rauf BabayevRauf Qafar oğlu Babayev 11 noyabr 1983-cü ildə Bakı şəhərində anadan olub. 2000–2004-cü illərdə Azərbaycan Texniki Universitetində bakalavr, 2004–2006-cı illərdə isə magistr təhsili alıb. 2008–2012-ci illərdə Bakı Musiqi Akademiyasında (BMA) “Solo oxuma” ixtisası üzrə oxuyub. 2017–2019-cu illərdə isə həmin təhsil müəssisəsində magist dərəcəsini fərqlənmə diplomu ilə başa vurub. Rauf Babayev 2008-ci ildən Azərbaycan Dövlət Akademik Musiqili Teatrında artist-vokalist vəzifəsində çalışır. Teatrın səhnəsində Ayı (“Qırmızı papaq”, E.Sabitoğlu, V.Kolmanovski), Muxomor (“Yağış göbələyinin macərası”, R.Şəfəq, V. Zimin), Köstəbək, Cadugər və May böcəyi (“Düyməcik”, H. X. Andersen), Ayı və Canavar (“Qoğalın macərası”, Ə.Hacıyev), Ölməz Koşşey (“İki küpəgirən qarı”, T.Karelina), Canavar (“Qızıl cücə”, V.Ulanovski, V.Orlov), Papa Karlo (“Buratino”, A.Rıbnikov, A.Tolstoy), Qoçu (“O olmasın, bu olsun”, Ü.Hacıbəyli), Qvardiyaçı və De Valver (“Çılğın Qaskoniyalı”, Q.Qarayev, P.Predova), Teatr direktoru (“Bayadera”, Y.Brammer, A.Qrinvald), Bernard (“Fransızsayağı qarnir”, M.Kamoletti), Leandr (“Skapenin kələkləri”, J.Molyer), Buba (“Qafqazlı qardaşqızı”, R.Hacıyev), Edvin (“Silva”, İ.Kalman), Müsyo Kombon (“Nuri-Didə Ceyhun”, Ə.Əmirli), Səlim (“Bir dəfə Bağdadda”, E.Sabitoğlu, V.Kolmanovski), Kommersant (“Balaca şahzadə”, R.Ağababayev, A.Ekzüperi), Petya (“Bəxtiyar”, T.Quliyev, B.Laskin, N.Rojkov), Vojevatov (“Lara Martin’s Jazz Club”, A.Ostrovski), İqor Qudimov (“Nəğməmə inan”, P.Bülbüloğlu, M.Şerbaçenko), San Sanıç (“Qorxma, biz səninləyik!”, P.Bülbüloğlu, Y.İsayeva, C.İmamverdiyev), Elvis Presli (Ə.Tağızadə, E.Preslinin mahnıları əsasında) və digər obrazları canlandırıb. O, 2010-cu ildən, həm də Abdulla Şaiq adına Azərbaycan Dövlət Kukla Teatrında da aktyorudur. Bu teatrın səhnəsində “Düyməcik”, “Qoçaq Əhməd”, “Çippolino”, “Göy saqqal”, “Nağıl haqqında nağıl”, “Pinokio”, “Karlson”, “Oyaq gözəl”, “Qoğal”, “Durna balığı”, “Maşa və ayı”, “Üç cəsur”, “Ağ və qara” və digər tamaşalarda iştirak edib. Rauf Babayev “Fəcr” (Təbriz, 2010), “Nauruz” (Kazan, 2011), “Xəzər sahili” (Həştərxan, 2018) və “ObraztsovFest” (Moskva, 2018) beynəlxalq teatr festivallarının iştirakçısı olub. 2012-ci ildən Bakı Musiqi Akademiyasının nəzdində fəaliyyət göstərən Şövkət Məmmədova adına Opera Studiyasında solist vəzifəsində çalışır. Studiyanın səhnəsində tələbələrlə birlikdə Ruits (“Trubadur”, C.Verdi), Edvin (“Silva”, İ.Kalman), De Qriye (“Manon Lesko”, J.Masne), Nemorino (“Məhəbbət şərbəti”, Q.Donizetti), Gənc qaraçı (“Aleko”, S.Raxmaninov), Çekalinski (“Qaratoxmaq qadın”, P.Çaykovski) və digər partiyaları ifa edib. Rauf Babayev ölkəmizdə və xaricdə keçirilən beynəlxalq teatr və musiqi festivallarında, eləcə də dövlət tədbirlərində fəal iştirak edir. Teatr sənəti sahəsində xidmətlərinə görə 2016-cı ildə Azərbaycan Teatr Xadimləri İttifaqının, 2021-ci ildə isə Azərbaycan Respublikası Mədəniyyət Nazirliyinin Fəxri fərmanları ilə təltif olunub.