Əmrah Dadaşov

Əmrah Balaxan oğlu Dadaşov 14 mart 1991-ci ildə Bakı şəhərində anadan olub. 2016-cı ildə Azərbaycan Dövlət Mədəniyyət və İncəsənət Universitetinin “Aktyor sənəti” ixtisasını bitirib. 1 mart 2015-ci ildən Musiqili Teatrda vokal artisti-solist vəzifəsində işləyir. Teatrda işlədiyi müddət ərzində müxtəlif tamaşalarda iştirak edib. Əmrah Dadaşov teatrın səhnəsində - Baladadaş (“Baladadaşın toy hamamı”, F.Allahverdi, Elçin), Xanəndə (“Ər və arvad”, Üzeyir Hacıbəyli), Süleyman (“Arşın mal alan”, Ü.Hacıbəyli), Təyyarəçi (“Balaca Şahzadə”, R.Ağababayev, A.S.Ekzüperi, səhn. İ.Fəhmi), Kvazimodo (“Paris Notr-Dama ithaf”, V.Hüqo, səhn. S.Qulamov), Cırtdan (“Yatmış gözəl və cırtdanlar”, Ş.Pero, səhn. A.Sadıqov), Sarkis (“Hacı Qara” M.F.Axundzadə), Meşəbəyi (“Qırmızı papaq” E.Sabitoğlu, Y.Şvarts), Ağacdələn (“Meşə çaqqalsız olmaz” Ə.Səmədli), Ayı (“Dəcəl çəpişlər” O.Zülfüqarov, R.Heydər), Kapitan Nik (“Bremen musiqiçiləri və Pen”, A.Sadıqov), Vətən (“Bir nəfəs qədər” S.Qulamov), Məhəmməd Füzuli (“Leyli və Məcnun” Ü.Hacıbəyli, M.Füzuli), Kişi (“Qadınım” T.Cücənoğlu) və s. rollarını ifa edib.

Əmrah Dadaşov bir neçə film və seriallara çəkilmişdir. O, 2018-ci ildə İran İslam Respublikasının istehsalı olan “Sərhəd” (“Arpa çayı - ayrılıq nəğməsi”) bədii filmində Aydın, “Şərab” filmində Davud (2019), “İzi itməyən cinayətlər” serialında Kamran (2015), “O gecə” serialında Qabil (2018), “Məhəbbətə məğlub” serialında Nicat (2019), “Sayrışan işıqlar” serialında İlyas (2020) obrazalarını canlandırıb. Eyni zamanda 2021-ci ilin mart ayında 31 Mart Soyqırımı Gününə həsr olunmuş "Sündü" (ssenari müəllifi və rej. S.Qulamov) qısametrajlı bədii filminə çəkilmişdir.

Əmrah Dadaşov 2017-ci ildə “Baladadaşın toy hamamı” (F.Allahverdi, Elçin) tamaşasındakı uğurlu ifasına görə 2 fevral Gənclər Günü münasibətilə Gənclər və İdman Nazirliyi tərəfindən təsis edilmiş “İlin gənc aktyoru” nominasiyasına layiq görülüb. 2020 və 2021-ci illərdə Prezident mükafatçısı olub.