Ülviyyə Əliyeva

Əliyeva Ülviyyə Fərhad qızı 15.09.1981-ci ildə Bakı şəhərində anadan olmuşdur. 1999-cu ildə Azərbaycan Dövlət Mədəniyyət və İncəsənət İnistitunun «Musiqili teatr aktyorluğu» fakültəsinə daxil olmuşdur. 1998-ci ildə Azərbaycan Dövlət Gənclər Teatrında işləyib. İşlədiyi müddətdə bir sıra rollarda, C.Məmmədquluzadə «Ölülər»də Nazlı, B.Vahabzadə «Atamın kitabı»nda Şəvkət bacı, Ə.Əmirli «Xoşbəxt gün»də Yeganə, Qabil «Şübhəli əhvalat»da katibə, Ə.Əmirli «20 il sonra»da Ofelya, Anar «Səhra yuxuları»nda 2-ci müxbir kimi iştirak etmişdir. 2001-ci ildə Azərbaycan Dövlət Musiqili Komediya Teatrına aktyor vəzifəsinə qəbul olunmuşdur. Teatrda işlədiyi müddət ərzində S.Ələsgərov, İ.Məlikzadə «Hərənin öz ulduzu» tamaşasında Ceyran, S.Fərəcov, Ə.Əmirli «Səhnədə məhəbbət»də müğənni qız, R.Mustafayev, A.Qüdrət «Volqalı canan»da İradə, R.Hacıyev «Talelər qovuşanda»da Gülər, O.Rəcəbov, A.Babayev «Əlin cibində olsun»da Lalə, R.Əkbər «Bəydullanın möhtəşəm toyu»nda Qiyamət, R.Mustafayev, C.Məmmədov «Məsmə xala dayımdır»da Aydan, V.Adıgözəlov, Anar «Adamın adamı»nda xəbərçi Xədicə, S.Fərəcov, R.N.Güntəkin «Bir günlük siğə»də Zöhrə, R.Mirişli, M.Haqverdiyev «Qısqanc ürəklər»də Elya, F.Allahverdi, Elçin «Baladadaşın toy hamamı»nda Anaxanım, Ü.Hacıbəyli «Arşın mal alan»da Telli, F.Sücəddinov, T.Vəliyeva «Mən dəyərəm min cavana»da Güldəstə, İ.Sadıqov (tərc.Dilsuz) «Molla Nəsrəddinin beş arvadı»nda Tutu, S.Rüstəmov, M.S.Ordubadi «Beş manatlıq gəlin»də Gülnaz, T.Quliyev, B.Laskin, N.Rojkov «Bəxtiyar»da Gülzar, P.Korotıç (tərc.A.İsmixanov) «Sehrli nəğmə»də Simurq quşu, E.Sabitoğlu, T.Vəliyeva «Bankir adaxlı»da Məleykə, Gülbikə, Ə.Əmirli «Nuri Didə-Ceyhun»da Sayad kimi rolların ifaçısı olmuşdur. O, bu obrazları özünəməxsuz ustalıqla oynamışdır. Azərbaycan Televiziyasında və «Space» kanalında bir sıra yumoristik verlişlərdə çıxış etmişdir. İsi Məlikzadənin «Subaylarınızdan görəsininz» ssenarisi əsasında «Hərənin öz payı+tayı» filmində çəkilmişdir.