Məzmuna keç

Nərgiz Kərimova

Nərgiz KərimovaNərgiz Faiq qızı Kərimova 13 avqust 1970-ci ildə Bakı şəhərində anadan olub. 1977–1988-ci illərdə Bülbül adına Orta İxtisas Musiqi Məktəbinin fortepiano sinfində təhsil alıb. 1988–1992-ci illərdə Üzeyir Hacıbəyli adına Bakı Musiqi Akademiyasının vokal sinfini fərqlənmə diplomu ilə bitirib. 1988-ci ildə Bəstəkarlar İttifaqının təşkil etdiyi musiqi festivalında uğurlu çıxışına görə laureat adına layiq görülüb. 1989-cu ildə Bakıda keçirilən “Qızıl payız – 89” Respublika müsabiqəsinin, 1990-cı ildə isə Moskvada təşkil olunan “Yeni adlar” III Ümumittifaq müsabiqəsinin laureatı olub. 1991-ci ildə Almatıda keçirilən Mixail Qlinka adına XIV Beynəlxalq Vokalçılar Müsabiqəsinin ikinci turundakı uğurlu çıxışına görə fəxri fərmanla təltif edilib. 1994-cü ildən Azərbaycan Dövlət Teleradio Şirkətinin solisti kimi fəaliyyət göstərir. Moskva, Sankt-Peterburq və Londonda keçirilən konsertlərdə iştirak edib. Dövlət tədbirlərində, Bakının müxtəlif konsert salonlarında, Respublika Sarayında, eləcə də Moskvanın “Rossiya” və “Sütunlu” zallarında çıxış edərək klassik və müasir əsərləri simfonik və kamera orkestrlərinin müşayiəti ilə ifa edib. 1 aprel 2002-ci ildə Azərbaycan Dövlət Musiqili Komediya Teatrına (indiki Azərbaycan Dövlət Akademik Musiqili Teatrı) aktyor vəzifəsinə qəbul edilən aktrisa teatrın səhnəsində müxtəlif xarakterli obrazlar yaradaraq öz ifaçılıq bacarığını nümayiş etdirib. Aktrisa “Talelər qovuşanda” (R.Hacıyev) tamaşasında Nərgiz, “Volqalı canan”da (R.Mustafayev, A.Qüdrət) Mülayim, “Bir günlük siğə”də (S.Fərəcov, R.N.Güntəkin) Mələk, “Aldın payını, çağır dayını”da (V.Adıgözəlov, Anar) Süsən, “O olmasın, bu olsun”da (Ü.Hacıbəyov) Gülnaz, “Arşın mal alan”da Gülçöhrə, “Qısqanc ürəklər”də (R.Mirişli, M.Haqverdiyev) Səbinə, “Milyonçunun dilənçi oğlu”nda (S.Ələsgərov, Ş.Qurbanov) Bildirçin, “İddialı qaraçı”da (İ.Kalma) Yulişka, “Xanuma”da (V.Dolidze, A.Saqarelli) Keto, “Mən dəyərəm min cavan”da (F.Sücəddinov, T.Vəliyeva) Gülnaz, “Qafqazlı qardaşqızı”nda (R.Hacıyev) Lalə, “Lara Martin’s Jazz Club”da (A.Ostrovski) Lara, “Silva”da (İ.Kalman) Silva Varesku, “Nəğməmə inan”da (P.Bülbüloğlu, M.Şerbaçenko) Tatyana Voloşina, “Bir dəfə Bağdadda”da (E.Sabitoğlu, V.Kolmanovski) Afət kimi obrazları özünəməxsus ustalıqla oynıb. 2003-cü ildə teatr sənəti sahəsində qazandığı uğurlarına görə “İlin ən yaxşı gənc aktrisası” nominasiyası üzrə Fəxri fərmanla təltif edilib. 2012-ci ildə ölkə başçısının müvafiq Sərəncamı ilə “Azərbaycan Respublikasının Əməkdar artisti” fəxri adına layiq görülən Nərgiz xanım 2013-cü ildən bəri həm də dəfələrlə Prezident mükafatçısı olub.