Akademik Musiqili Teatrın “Anamın kitabı” tamaşası Pakistanda təqdim olunacaq

Azərbaycan Dövlət Akademik Musiqili Teatrının bir qrup yaradıcı heyəti Pakistanın Kəraçi şəhərində dekabrın 7-dək davam edəcək “Pakistan İncəsənət Şurası”nın (“Art Council Pakistan”) təşkilatçılığı ilə ərsəyə gələn Dünya Mədəniyyəti Festivalında iştirak edəcək.
ABŞ, Rusiya, Türkiyə, Almaniya, Fransa, İtaliya, Yaponiya, Braziliya, İraq, Mərakeş və ümumilikdə 140 ölkədən 1000-dən artıq teatr və incəsənət nümayəndəsinin qatıldığı bu mötəbər beynəlxalq festival çərçivəsində Musiqili Teatrın “Anamın kitabı” tamaşası təqdim olunacaq.
 Azərbaycanın görkəmli yazıçı-dramaturqu Cəlil Məmmədquluzadənin eyniadlı pyesi əsasında Prezident mükafatçısı İradə Gözəlovanın quruluşunda hazırlanan tamaşanın quruluşçu rəssamı Vüsal Rəhim, döyüş səhnələri və rəqslərin quruluşçusu Xalq artisti Pərviz Məmmədrzayev, rejissoru isə Zaur Əliyevdir.
Tamaşa teatrın istedadlı aktyorları – Səmədzadə Xasiyev, Hüseyn Əlili, Zaur Əliyev, Nəzrin İsmayılzadə, Adelin Öztürk, Nərmin Əliyeva, Əli Kərimov, İranə Kərimova, Sübhan Rüstəmov və Murad Əliyevin ifasında ingilis dilində nümayiş olunacaq.
Qeyd edək ki, səfər çərçivəsində Azərbaycan Dövlət Akademik Musiqili Teatrının nümayəndə heyəti teatrlararası mədəni əlaqələrin daha da genişləndirilməsi məqsədilə bir sıra görüşlər keçirməyi də planlaşdırır.

Tarix: 29.11.2025