Azərbaycan Dövlət Akademik Musiqili Teatrı Şəkidə keçirilən IV Beynəlxalq Teatr Festivalında uğurla iştirak edib.

Mədəniyyət Nazirliyinin təşkilatçılığı və maliyyə dəstəyi ilə regionlara təşkil olunan qastrol səfərləri proqramına uyğun olaraq festivalda iştirak edən teatr “Molla Nəsrəddinin beş arvadı” (İ.Sadıqov, quruluşçu rejissor Ə.Əsgərov) komediyasını təqdim edib.

Şəki Dövlət Dram Teatrının səhnəsində nümayiş olunan tamaşada rolları Əməkdar artistlər Əzizağa Əzizov, İqrar Salamov, Prezident mükafatçısı Mehriban Zaliyeva, aktyorlar Gülnarə Abdullayeva, Ülviyyə Əliyeva, Gülcahan Salamova, Gülnarə Əzizova, Şaban Cəfərov, Əliməmməd Novruzov, Fərid Rzayev, Cəbrayıl Cəbrayılov ifa ediblər.
Yaradıcı heyətin çıxışı festival iştirakçıları tərəfindən sürəkli alqışlarla qarşılanıb.
Qeyd edək ki, səhnə əsərinin rəssamı Əməkdar rəssam Nabat Səmədova, quruluşçu baletmeysterləri Əməkdar artistlər Zakir və Yelena Ağayevlər, rejissor assistenti Tamilla Aslanovadır.
Tamaşanın sonunda teatrın yaradıcı kollektivinə Şəki Şəhər İcra Hakimiyyəti və Şəki Dövlət Dram Teatrı adından mükafatlar və xatirə hədiyyələri təqdim olunub.
Musiqili Teatrın direktor müavini Hüseyn Hüseynov yaradılan şəraitə görə teatr rəhbərliyi və kollektiv adından təşkilatçılara və zəhməti olan hər kəsə təşəkkürünü bildirib.