Azərbaycan Dövlət Musiqili Teatrı

Bədii heyət

Fəxrəddin Atayev

Fəxrəddin Atayev


Atayev Fəxrəddin Qəhrəman oğlu, 31 yanvar 1972-ci ildə Bakı şəhərində anadan olub. Orta məktəbi bitirdikdən sonra 1993-1999-cu illərdə Bakı Musiqi Akademiyasının "Nəfəs alətləri orkestrinin dirijoru” ixtisası üzrə bakalavr və magistr elmi dərəcəsi alıb. 

 F.Atayev əmək fəaliyyətinə 1988-ci ildə Azərbaycan Karlar Cəmiyyətinin mədəniyyət evində musiqiçi vəzifəsində başlayıb. 1990-1992-ci illərdə həqiqi hərbi xidmətə çağırılıb və hərbi orkestrin baş musiqiçisi vəzifəsində xidməti başa vurub. 1993-1998-ci illərdə Azərbaycan Dövlət Nəfəs Alətləri orkestrində valtorna alətləri qrupunun konsertmyesteri vəzifəsində çalışıb və 1998-2014-cü illərdə həmin orkestrin dirijoru vəzifəsində fəaliyyət göstərib. 1999-2004-cü illərdə M.Maqomayev adına Azərbaycan Dövlət Filarmoniyasının Dövlət Rəqs ansamblının dirijoru vəzifəsində çalışıb. Bu dövr ərzində çoxsaylı dövlət tədbirlərinin və eləcə də Dövlət Rəqs Ansamblının 30 illik yubileyinə həsr edilmiş konsertin iştirakçısı olub. 2000-2005-ci illərdə Azərbaycan Dövlət Opera və Balet teatrının simfonik orkestrinin dirijoru vəzifəsində çalışıb. 1999-cu ildə Azərbaycan Dövlət Akademik Opera və Balet teatrında ilk debütü Z.Hacıbəyovun "Aşıq Qərib” operası ilə olub. 2004-2017-ci illərdə Azərbaycan Milli Konservatoriyasının baş müəllimi kimi fəaliyyət göstərib. O, dirijorluq və simfonik orkestr alətləri fənlərinə dair metodiki işlərin və dərs vəsaitlərinin müəllifidir. Belə ki, "Alətşünaslıq” fənni üzrə V-XI siniflər üçün proqram, "Dirijorluq” fənni üzrə V-XI siniflər üçün proqram, "Azərbaycan xalq çalğı alətləri orkestri üçün işləmələr” adlı dərs vəsaiti, Xalq çalğı alətləri orkestrində "Cahangir Cahangirovun "Füzuli” kantatasının dirijorluq xüsusiyyətləri” adlı metodiki tövsiyyələrin müəllifidir. Musiqişünaslıq və folklorşünaslığa dair elmi məqalələri vaxtaşırı olaraq "Hərbi bilik”, "Tədqiqlər”, "Qobustan”, "Dədə Qorqud” və başqa jurnallarda dərc edilib. Beynəlxalq konfransların iştirakçısıdır. F.Atayev ilk dəfə olaraq "Milli Nəfəs Alətləri” orkestrinin yaradılması təklifini irəli sürmüş, üç ay ərzində Milli Konservatoriya nəzdində tərkibi 21 nəfərdən təşkil olunmuş milli nəfəs alətlərinin ifaçılarından ibarət orkestr yaratmış və konsert proqramını təqdim etmişdir. 2008-2017-ci ildən Azərbaycan Dövlət Televiziya və Radio Verlişləri QSC-nin "Niyazi” adına simfonik orkestrinin dirijoru vəzifəsində çalışıb. Bu dövr ərzində bir çox Azərbaycan və xarici ölkə bəstəkarlarının simfonik və xor əsərlərinin lentə alınmasında bir dirijor kimi iştirak edib. 2009-cu ildən bu günədək M.Maqomayev adına Akademik Dövlət Filarmoniyasının F.Əmirov adına Əməkdar kollektiv Dövlət Mahnı və Rəqs ansamblının xormeysteri vəsifəsində çalışır. Bu dövr ərzində kollektivin repertuarını tam yeniləyərək onlarla xalq və bəstəkar mahnılarını xor üçün işləyib. 2010-cu ildə F.Atayev "Novruz” adlı konsert tamaşasının ssenarisini yazmış və Dövlət Flarnomiyasının F.Əmirov adına Mahnı və Rəqs ansamblının kollektivi ilə hazırlayıb.

O, həmçinin bəstəkar kimi bir sıra müsabiqələrin iştirakçısı olub. 1996-cı ildə Azərbaycan Televiziya və Radio Verlişləri QSC-nin təşkil etdiyi ən yaxşı "Vətənpərvətlik marşı”na görə müsabiqənin III yer üzrə mükafatçısı, 2004-cü ildə ANS şirkətlər qrupu və Milli Qəhrəman Çingiz Mustafayev fondunun təşkil etdiyi "Qızıl marş” müsabiqəsinin diplomantı adına layiq görülüb. F.Atayev simfonik orkestr, xor və solistlər üçün "Olimpiyada” uvertüra balladasını 2007-ci ildə yazıb. Əsər kütləvi xoreoqrafik, idman tamaşaları zamanı ifa edilmək üçün nəzərdə tutulub. Azərbaycan Respublikası Milli Olimpiya Komitəsinə təqdim edilmiş və müsbət rəy alıb. Komitənin prezidenti tərəfindən 26.12.2007 tarixində imzalanmış xüsusi sertifikatla təltif edilib.

Çalışdığı dövrdə keçirilən konsertlərdə və dövlət əhəmiyyətli tədbirlərin bədii hissələrində iştrak edib. 2001-ci ildə Opera və Balet teatrının truppası ilə Türkiyənin İstanbul şəhərində Ü.Hacıbəyovun "Leyli və Məcnun”, Z.Hacıbəyovun "Aşıq Qərib” operalarının nümayişi zamanı tamaşalara dirijorluq edib. 2001-ci ildə dünya şöhrətli musiqiçi Mistislav Rastropoviçin atası Liyapold Rastropoviçin ev muzeyinin açılış mərasimini, 2002-ci ildə "Üzeyir Musiqi günü” zamanı Dövlət Kapellasını müşayiət edən orkestr Üzeyir Hacıbəyovun "Qalx ayağa millət”, "Koroğlu” operasının üverturasını və M. Maqomayevin "RV-8” marşını ifa edib. Səslənən əsərlərin ikisini F.Atayev qısa müddət ərzində orkestr üçün orkestrləşdirilib. Dövlət Nəfəs Alətləri orkestri F.Atayevin rəhbərliyi ilə 2000-ci ildən başlayaraq Gəncə şəhər günlərində, 2005-ci ildən başlayaraq hər il H.Əliyev adına Yeni Təhsil Kompleksində tədris ilinin açılış və bağlanış mərasimlərində, hər ilin 9 may tarixində Nərimanov rayonunda yerləşən Qardaşlıq məzarlığındakı anım mərasimində, teatr mövsümlərinin açılışlarında, Novruz bayramı ilə əlaqədar keçirilən kütləvi tədbirlərdə, Azərbaycan Diplomatiya Akademiyasının magistr buraxılışlarında, Beynəlxalq Kitab sərgisinin açılış mərasimində və habelə, İçəri şəhərdə keçirilən və İctimai Televiziya tərəfindən yayımlanan "Üzüm” bayramında müvəffəqiyyətlə çıxış edib. 

F.Atayev 2009-cu ildən etibarən Azərbaycan Dövlət Musiqi Teatrında simfonik orkestrin dirijoru, 2017-ci ildən isə baş dirijor vəzifəsində fəaliyyət göstərir. Teatrda fəaliyyəti müddətində o, bir sıra tamaşaların quruluşçu dirijoru olub. F.Əmirov       "999-cu gecə”, Ə.Əmirli "Nuri-didə Ceyhun”, S.Bekket "Qodonun intizarında”, Q.Qarayev, İ.Əfəndiyev "Mənim günahım”, E.Sabitoğlu, V.Kolmanovski "Bir dəfə Bağdadda”, F.Allahverdi, Elçin "Baladadaşın toy hamamı”, E.Sabitoğlu, E.Şvarts "Qırmızı papaq” tamaşalarının musiqilərinə quruluş verib. Musiqili Komediya Teatrının təqdim etdiyi Qoqolun "Evlənmə” tamaşası 2011-2012-ci ilin yekunlarına görə Mədəniyyət və Turizm Nazirliyinin təsis etdiyi "Zirvə” mükafatına layiq görülən tamaşanın dirijoru olub. 

2016-cı ilin 22 sentyabr tarixində Azərbaycan Respublikası Prezident İlham Əliyev cənabları tərəfindən verilən sərəncama əsasən Azərbaycan milli musiqi mədəniyyətinin inkişafında xidmətlərinə görə "Əməkdar incəsənət xadimi” adına layiq görülüb.

 



Baxış sayı:1502 | Şərhlər:0 | Müəllif: | Əlavə olunma tarixi:15-01-2015, 15:50

Facebook
Faydalı linklər
Heydər Əliyev Fondu
Azərbaycan Prezidenti İlham Əliyev
Azərbaycan Respublikası Mədəniyyət və Turizm Nazirliyi
Счетчик

Яндекс.Метрика